प्रेश विज्ञप्ति
(जानकारी तथा प्रचार प्रसार का लागि)
ट्रान्सपरेन्सी इन्टरनेशनल (टीआई) नेपालद्वारा जारी अपील
कोभिड–१९ सम्बन्धी विपद् व्यवस्थापन कार्यमा जवाफदेहिता, पारदर्शिता र सदाचार कायम होस्
अहिले सारा विश्व कोभिड–१९ संक्रमणको महामारीबाट आक्रान्त छ । यस महामारीबाट २४ लाखभन्दा बढी संक्रमित भई १ लाख ७० हजारभन्दा बढीले ज्यान गुमाएका छन् । यसको रोकथामको लागि धेरै मानिसहरु आइसोलेशन, क्वारेन्टाइन वा उपचारको क्रममा छन् । सामाजिक दूरी बढाउन संसारभरि नै विभिन्न देशहरुले लकडाउन गरी आवात–जावत, उडान र सीमामा बन्देज लगाएको अवस्था रहेको छ।
विपद्को यस विषम परिस्थितिमा नेपालमा संक्रमणको सम्भावना कम गर्न सरकारद्वारा करिब ५ हप्ताको राष्ट्रव्यापी लकडाउन चरणवद्धरुपमा वैशाख १५ गतेसम्म लागू गरिएको छ । आवश्यक सावधानी अपनाउने, घरमै बस्ने, विदेशबाट आएकालाई क्वारेन्टाइनमा राख्ने र शंका लागेकालाई परीक्षण गर्नेजस्ता काम केन्द्र, प्रदेश र स्थानीय सरकारबाट सुरु गरिएको छ । लकडाउनको समयमा संक्रमण कम गर्न सबैले सरकारलाई सहयोग गर्ने क्रममा स्वास्थ्यकर्मी, सुरक्षाकर्मी, स्थानीय जनप्रतीनिधि, सञ्चारकर्मी, समाजसेवी र सहयोगी सक्रिय रहेका छन् ।
कोभिड–१९ सम्बन्धी तिनै तहका सरकारबाट भइरहेका र अब हुने विपद् ब्यवस्थापनका कार्यमा जवाफदेहिता, पारदर्शिता र सदाचार कायम होस् भन्ने हेतुले भ्रष्टाचार विरुद्ध सक्रिय ट्रान्सपरेन्सी इन्टरनेशनल (टीआई) नेपालद्वारा सम्बन्धित पक्षको ध्यानाकर्षणका लागि यो १० बुँदे अपील जारी गरिएको छ :
१. कोभिड–१९ सँग सम्वन्धित प्रयास र कार्ययोजना थप प्रभावकारी बनाउन सामूहिक र क्षेत्रगत प्रयास जरुरी छ । विषयगत विषेशज्ञहरु सम्मिलित समितिहरुबाट यस विपद् व्यवस्थापनका चरणवद्ध कार्ययोजना निर्माण गरी लागू गरिनु आवश्यक छ ।
२. कोभिड–१९ संक्रमण रोक्ने केन्द्र, प्रदेश र स्थानीय सरकारका राष्ट्रिय, प्रादेशिक र स्थानीय कार्ययोजनामा भ्रष्टाचार र अनियमितता हुनबाट रोक्ने र भएको खण्डमा कडा कारबाही गर्न जरुरी छ ।
३. कोभिड–१९ रोकथाम गर्ने केन्द्र, प्रदेश र स्थानीय सरकार र तीनका निकायहरुको समन्वयात्मक कार्यमा जवाफदेहिता बढाउन जरुरी छ ।
४. कोभिड–१९ संक्रमण रोक्न तिनै तहको सरकारबाट विनियोजित बजेट र संकलित रकमका साथै तिनको प्रयोग एवं खर्चको विवरण सर्वसाधारणका लागि पारदर्शी बनाइनु पर्दछ ।
५. कोभिड–१९ रोकथामसम्बन्धी उपकरण, सामाग्री तथा औषधि सार्वजनिक खरिद प्रक्रिया र ऐन–कानूनबमोजिम तोकिएका, जिम्मेवार तथा विशिष्टकृत निकायबाट किफायतीरुपमा गरिनुपर्दछ ।
६. सरकार र संघ–संस्थाहरुभित्रैबाट कोभिड–१९ सम्बन्धी कार्यलाई पारदर्शी बनाउने वा अनियमितताबारे जानकारी दिने कर्मचारी वा अन्यलाई कारबाही नहुने व्यवस्था सुनिश्चित गरिनुपर्दछ ।
७. कोभिड–१९ सम्बन्धी काम–कारबाहीबारे सूचना माग्न पाउने नागरिकको हक सरकारद्वारा सम्मान गरिनुपर्दछ ।
८. कोभिड–१९ नियन्त्रण सहयोगी औषधि, मास्क, स्यानिटाइजर, साबुन, चस्मा, प्रोटेक्टिभ लुगा, भेन्टिलेटर आदि सरकारबाट तोकिएका स्वास्थ्य संस्थामा यथाशिघ्र उपलब्ध गराइनु पर्दछ ।
९. सरकारीस्तरबाट हुने कोभिड–१९ को रोकथाम र नियन्त्रणसम्बन्धी सबै प्रकारका विपद् ब्यवस्थापनका प्रयासमा मानवअधिकार र जनचाहनालाई केन्द्रविन्दु बनाइनु पर्दछ ।
१०. कोभिड–१९ सम्बन्धी सरकारी प्रयास र कार्यमाथि संसद्द्वारा सक्रियरुपमा निर्देशन, अनुगमन र सुपरिवेक्षण गरिनुपर्दछ ।
मुकुन्द बहादुर प्रधान, महासचिव
ट्रान्सपरेन्सी इन्टरनेशनल (टीआई) नेपाल
